Kum 1990 in 1997 karlak hrawngah Chinmi mitlawmte cu United State of America ram rak phan a si. Kum 2001 ah Chinmi cheukhat cu biaknak lei hremnak ruangah Guam an rak phan rih hna. Guam in Indiana, Texas, Michigan le District of Columbia, Maryland le a dang states ah an phan. Cun, India lei Malaysia in ralzaam sinak in tam ngai an phan. Chinmi nih an phaknak hmun le khua cio ah Khrihfabu dirh asi. Khrihfabu an tam ngai cang.

 

Maryland Chin Baptist Church (MCBC) chungtel hna cu Chin Baptist Mission Church (CBMC) a simi kan Lai hritlai sinah caan sau nawn a um i, January 18, 2015 ah dirh asi. March 15, 2015 ah CBMC nih amah tein Khrihfabu pakhat si ve dingah thluachuahnak a pek. MCBC cu Chin Baptist Churches, USA chungtel a si.

 

Tlangtar cu “Kan lu a simi Khrih lei ah a lam kip in thang hna u sih” (Efesa 4:15)

​

ZEIDAH KAN ZUMH (WHAT WE BELIEVE)

BIBLE (THE BIBLE)

Bible thiang cu Pahian bianung, minung nih tialmi asi nain Pathian nih thaw achuahhnawhmi asi caah ahmanmi le zumhawk atlakmi asi (II Tim. 3:16). Aa palh kho lomi Pathian bianung, minung sinah phuanmi le kan caah aherhmi asi. Cawnpiaknak caah palhnak angei lomi asi. Khrihfa dihlak lamhruainak, zulhding le i nunpi nak caah nawlngeihtu bik asi.

​

THUMKOMH PATHIAN (GOD IS TRIUNE)

Pathian pakhat kha kan zumh, Amah cu zungzal hmunmi le thiannak in atlingmi, biatak le dawtnak asi. Pathian cu pakhat asi i Pa, Fapa, le Thiang Thlarau tiin sining pathum in alangmi asi. Pathian pathum an si tinak asi lo.

 

PA PATHIAN (FATHER GOD)

Pa Pathian cu van le vawlei, hmuhkhawhmi le hmuhkhawh lomi thil vialte sertu asi (Kol 1:16). Asermi hna cungah nawl ngeitu asi i lungthin dihlak, nunnak dihlak, thazang dihlak le ruahnak dihlak in dawtawktlak Pathian asi (Lk. 10:27). Hmur le kaa in chimkhawh lomi a velngeihnak ruangah fapa ngeih chun Jesuh Khrih cu vawlei mi vialte khamh chuah dingin akan pek.

 

FAPA JESUH KHRIH (SON JESUS CHRIST)

Khrih cu zungzal hmunmi Pathian fapa asi (I Johan 4:15). Thiang Thlarau thawngin ngaknu thiang Mary chungin titsa ah acang i minung ah hrinmi asi. Amah cu minung sinak le Pathian sinak kha tling tein angeimi asi. Sualnak chungin akan khamh khotu cu Amah lawnglawng asi. Mi vialte nih khamhnak an hmuhkhawh nakhnga cunglei in Pa Pathian nawl kha a upat i vailam cung thihnak tiangkha nawlngeih he azul. Khrih cu khrihfabu lu bik asi (Kolo. 1:18).

 

THIANG THLARAU (HOLY SPIRIT)

Thiang Thlarau cu Pa le Fapa he sining aa khatmi asi i nunnak Bawi le nunnak petu asi. Thiang Thlarau nih cun zumtu hna kha nunzia kan thiamkhawhnak dingah thawnnak a kan pek i Pathian biatak kan theihfian khawhnak hnga lam akan hruaitu le cawnpiaktu asi (Johan 14:26).

 

MINUNG (MAN)

Minung cu Pathian nih amah muisam keng in sermi asi (Gen. 1:27). Sihmanhsehlaw Satan nih a tukforh ruangah Pathian he ralchanh in aum caah dantatnak kha a ing. Ruahchannak angei tilo mi, sualnak in akhatmi le atlaumi asi lio ah Amah (Pathian) sunparnak ding caah Khrih nih akhamh mi asi (Luke 19:10).

 

THAWNGTHA BIA (THE GOSPEL)

Pathian nih misual hna he iremthannak caah kan Bawipa Jesuh Khrih hmangin aphuan chuakmi thawngtha bia asi (II Kor. 5:18). Kan mah misual hna ai ah amah lungtho tein Pathian sinah anungnak cu Khrih nih vailam cungah apek. Khrih athihnak nih cun Pathian lung atlinter. Cu cu khuaruahhar Khrih dawtnak le velngeihnak kha asi.

 

KHAMHNAK (SALVATION)

Khamnak cu Khrih chung lawngah zumhfeknak le ingeihchihnak lungthin ngeih hnu ah Pathian sin in tin comi laksawng asi (II Kor. 7:9-10). Khamhnak cu zumhnak he Jesuh Khrih ah ingeihchihnak lungthin kan ngeih cang kain athawk cang. Jesuh Khrih thawngin mi vialte nih tin co dingmi khamh luatnak asi.

 

KHRIHFABU (THE CHURCH)

Khrihfabu cu Jesuh Khrih pum kha asi i amah Jesuh hrim hrim kha lubik asi (Efesa 1:13). Zumtu hna cu amah Khrih chungtel kan si hna i vawlei dongh tiang thawngtha bia kha aupi ding kan si hna. Khrihfabu cu zumtu kan nih kha kan si. Khrihfabu cu thawngtha bia akarhzai khawhnak dingah Pathian mifa hna ibawmhchannak, thazang i peknak, le i dirkamnak hmun asi. Kan nih cu Jesuh Khrih thawngtha bia caah zumhawktlak tein tette tha si ding kha asi. Khrihfabu cu zumtu hna kan i hawikomhnak hmun asi (Sam 55:14; Lam 2: 42).

 

TIPILNAK (BAPTISM)

Khrihfami hna tipil innak cu ti chungah pum za tein pildih (immersion)kha alanghtermi asi. Cu cu zumtu hna nih Jesuh Khrih chungah nawlngeihnak he sual ngeihchih langhternak caah tuahmi asi. Zumtu hna nih mi zapi hmai le Pathian hmaiah Khrih hnuzultu asinak langhternak caah asi (Matt 28:19). Ti chung kan pil ah khan kan sualnak vialte cu Khrih athihnak ah athi ve i, ti chungin kan chuah ah khan nun ning thar in kan tho than ve tikha langhternak caah asi (Rom 6:3-4).

 

BAWIPA ZANRIAH (THE LORD’S SUPPER)

Bawipa zanriah hman dingmi hi Khrih nih akan cah takmi abia rovui asi. Bawipa zanriah kan hmanmi cu Khrih nih kan caah apum akhuaimi le athi athletmi ai ah misur hang le changreu kan hman kha asi. Khrih thisen cu kan sual ngeihthiamnak ding caah le biakam fehternak ding caah asi (Matt.26:27). Kan Bawipa Jesuh Khrih athihnak le aratthan hlan tiang philhlonak dingah hmanmi asi (I Kor. 11: 25-26; Luke 22:19). Bawipa zanriah cu mi nih hnekchom si loin pumpak biachahnak in hmanmi asi i Tipil Khrihfabu nih cun tipil a ing ciami lawng nih hmanmi asi.

 

MISSION RIAN (EVANGELISM & MISSIONS)

Thawngtha karhternak rian cu Khrih hnuzultu kip le Khrihfabu kip nih kan rian le kan tuanvo asi i zumlotu hna nih Jesuh Khrih kha an theihkhawh ve nakhnga khuaza ramkip ah kal in thawngtha bia aupi le phuanchuak kha asi. Atlaumi thlarau kha kawl in Khrih hnuzultu siter kha kan mission rian asi (I Kor. 9:22).

 

CHUNGKHAR (THE FAMILY)

Chungkhar hi mibu lakah Pathian nih thlua achuahmi asi (Heb 13:4). Nupi va ngeih timi cu nu pakhat le pa pakhat nun chung umti ding le sining i hrawmti dingah Pathian hmaiah biakamnak serkha asi. Nupi le va cu Pathian muikeng in sermi an si veve caah Pathian hmaiah aatlukmi an si. Nu le va pehtlainak cu Khrih nih Khrihfabu apehtlai bantuk khan an i pehtlai ve tikha alanghter (Efesa 5:22-33). Nu le va sinnak in kan hmuhmi fale hna cu Pathian sinin arami rosung an si hna (Sam 127:3).