top of page

“Rian Tha Tuan Awk ah Kan Kut Tthawnter Hna Usih”



Sweet December nih achuahpi mi lawmhnak cu nan cungah tlung ko seh! December thla cu kan Bawipa Jesuh Bethlehem ah achuahnak kong nih acul dihnak ni le camtuak asi. Khat lei in kan chim ahcun Pathian kong kan chimceih khunnak ni le thla asi caah December thla ahcun zeidang kong nak in Khrih kong chim hna u sih. Kan mail, viber le facebook zongah Khrih kong nih culve hram seh.

Thawngttha i hrawm hna u sih:

Cun ka Pathian kut, ka cung i tthatnak caah a ummi le siangpahrang nih ka sinah a chimmi bia hna kha annih cu ka chimh hna. “Cun annih nih an i thawh i, “Tho u sih law sa hna u sih,” an ti. Cuticun rian ttha ttuan awk caah cun an kut cu an i tthawnter (Nehemiah 2:18).

1. Pathian rian caah kan lungre atheih awk asi. Nehemiah cu arawk a man ciami vampang Jerusalem hauhruang le kutka hna remhnak dingah Pathian nih rian akhinh. Cu rian akhinh lio caan hi Nehemiah cu Persia ram ah an siangpahrang Artazaksis hrai putu rian attuan lio asi. Zumlotu siangpahrang kut tangah apawcawmnak rianttuan buin Pathian fialmi rian tlinh ding hi Nehemiah caah cun asi kho lomi thil asi. Zumlotu nih cun Isreal Pathian cu an huatmi asi fon. Nehemiah caah cun Pathian nih rian akhinhmi hi sobul le cengceh karlak ah um tluk in aharmi asi. Cu caan lio ahcun Persia mi hna nih Israel ram vialte kha an rak uk lio caan asi. A liannganmi siangpahrang Artazaksis hrai putu rian attuanmi hi Nehemiah caah cun rianttha ngai ngai le riansang asi. Voikhat cu siangpahrang pa cabuai ah misur zuu va pek ding in Nehemiah cu aa thawh. Siangpahrang hmaiah va lang tikah hin mithmai panh le lawmhnak mithmai he va lang ding kha an rian biapi bik asi. Aruang cu siangpahrang lawmhter kha an rian asi. Asinain Israel mipa Nehemiah cu Jerusalem vampang le kutka vialte rawk cikcek le man cicek in um ko bu ah alian ngan siangpahrang inn chung um kha atthutpi kho ti lo, alungre athei, angeih achia i amit hmai apanh kho ti lo. Mitsur zuu hrai cu aa put i siangpahrang Artazaksis cabuai ava chiah tikah cun amit hmai apanh kho ti lo caah Artazaksis alung ahring cang. Ziah mithmai chia le lungre thei in na um ko tiah Nehemiah cu ahal tikah, Bawipa ka khua le ram asimi Jerusalem cu arawh dih caah vampang le kutka remh ding ruangah ka lungre theihnak asi tiah ati. Siangpahrang pa nih cun ruah lo piin keimah nih vampang le kutka remh cu kan bawmh lai ati diam ko ai. Lianngan bik Pathian rian caah Nehemiah alungre theihnak Pathian nih atheih caah zumlotu siangpahrang cu amah bawmtu ah aser piak. U le nau hna, Pathian rian na ttuan khawh lomi ruangah na lungre athei bal maw? Pathian rian caah kan lungre atheih hi Pathian mifa taktak kan si kha tette akhan!

2. Tho u sih law vampang le kutka cu sa hna u sih. Jerusalem khua hi khua thiang (holy city) tiah khawhmi asi. A ruang cu Pathian biakinn umnak, Pathian mifa hna an ruhro an phumnak le Pathian pekmi khua asi an ti caah kilven le zohkhenh aherhnak kha Nehemiah nih alanghtermi asi. Cu bantuk siamremhnak rian cu Pathian rian asi kha an i sehchih. Nehemiah cu Pathian nih siangpahrang cu keimah bawmhtu ah aka thlahpiak tikha atheih cang kain Persia ram Susan khua in Jerusalem lei cu Artazaksis thlahpiakmi minung hna he kal hram an thawk. An lam can hi Susan in Jerusalem khua tiang hi khan 900 hrawng aa hlat i Nehemiah le a mi pawl hi thlali hrawng an rau lai ti asi. Jerusalem an phak tikah cun Nehemiah nih siangpahrang chimhmi bia vialte kha ami hna cu achim hna tikah mipi nih an lehmi cu “tho u sih law sa hna u sih” tiah an ti. “Tho u sih” timi cu kan thutnak in dir u sihlaw cawlcangh cang hna u sih tinak asi ko. Kan Jerusalem bantuk asimi MCBC biakinn pi dirhkhawhnak dingah tthu hna hlah u sih, dai tein um hna hlah u sih, tho u sih law sa hna u sih!

3. Rianttha ttuan awkah kan kut tthawnter hna u sih. Minung nih rianttha kan timi le Pathian nih rianttha atimi hi ai dang ko. Nehemiah cu siangpahrang hrai putu rian kha attuan tikah minung hmuhnak ahcun rianttha taktak atleih tikhawh asi. Asi nain Bible nih rianttha atimi cu Pathian caah rianttuan le caan pek kha rianttha ati tthan ve. Nehemiah cu apaw cawmnak caah rianttha ahmuhmi kha a Pathian caah hman le pek aduhtu pa asi. Nihin US zongah kan phut tawk lo pi minung lei khel in rianttha tampi company ah kan ttuan cio hna. Pathian salttha Nehemiah bantuk in rianttha kan hmuhmi kha Pathian caah caanttha laknak le Amah rian kaudeuh le thukdeuh in kan ttuankhawh tu ah cang hram seh. Pathian a rian kan ttuan khawh chinchin nak dingah cherhchan pakhat ah i lak tuah hna u sih. Kan biakinn pi tungdirh rian hi Bible nih rianttha atimi cu asi. Na zang ader sual maw? na kut tha adih sual maw? Dai thlang in na um sual maw? Te lai (pending) rian ah nai chiah sual maw? Riantha hi kan nganh sual maw? Rianttha ttuan awkah kan kut cu tthawnter hna u sih! Amen.

# Bawipa nih thlua in chuah ko hna seh!

Pastor Thomas BK Lian

95 views0 comments

Recent Posts

See All

Comments


bottom of page